كلامنا النهاردة هيكون عن التيار المتردد ( Alternative Current )
و التيار المستمر ( Direct Current )
يلا بسم الله
قبل ما ندخل في تفاصيل هكلمك بنظرة عامة عن المقال كدا، بص يسيدي الحرب بتاعتنا النهاردة مختلفة شوية علشان هى حرب بين مجهولين ( لا تُرى ) ، و أنا اقصد بمجهولين اننا منقدرش نستغني عن طرفي حربنا النهاردة في حياتنا اليومية بأي شكل من الأشكال و في نفس الوقت ما نقدرش نشوفهم ( شئ غير مادى ملموس ) و هى دي بقى اللى خليت الموضوع صعب شوية، طيب علشان مش عايز أصدع دماغك من بدرى تعال نشوف احنا هنتكلم في ايه.....
هنتكلم عن أبرز الفروقات بين النوعين و المميزات والعيوب لكل نوع منهما ، و فى الآخر هنستنتج سوا أيهما أفضل فى الإستخدام وأيهما الأخطرعلي حياتنا و ازاي نقدر نحمي نفسنا ، وازاي نحول من تيار متردد لتيار مستمر والعكس و هنعرف ليه لما بنمسك الشاحن ما بنتكهربش مع انه متوصل في الفيشة دى كلها حاجات هنعرفها بالتتابع، ف يلا بينا نبدأ
مميزات التيار المتردد والمستمر والفرق بينهما
فاكرين في نهاية القرن الثامن عشر وحرب التيارات؟
التيار المستمر DC:-
أنا مش جى أكلمك في تعريفات و اصدع دماغك بها و انه عبارة عن تدفق من الشحنات أو إنه عبارة عن سيل من الالكترونات بقي والكلام دا لكن خلينا نقول انه تيار ثابت الشدة والاتجاه، واكتشفه طرف من أطراف حرب التيارات " أديسون " اللى اتكلمنا عنها فى المقال اللى فات.
المميزات:-
ندخل بقى على مميزات التيار المستمر
أولاً - سهولة توليده من البطاريات والخلايا الشمسية.
ثانياً - تردده دايما صفر، شدة قوته دايما بتساوي1.
ثالثاً - بنستخدمة اكتر في مجالات الطاقة الكهروضوئية في الانظمة الشمسية المتنقلة ، لو مش عارف اي هي دي...استني ليها مقال بالتفصيل.
العيوب:-
تيجى تقولى دا جميل جدا التيار المستمر ايه بقى العيوب اللى ممكن تغطى على المميزات دى هقولك إن عيوبه كتير اهمها انه صعب ان يتم نقله لمسافات بعيدة
و لو حبينا او قررنا نجرب و ننقله لمسافات بعيدة هتقابلنا مشكلة كبيرة ألا و هى الكابلات.
الكابلات المستخدمة في عملية نقل التيار المستمر هتكون مساحة مقطعها كبيرة وبالتالي إرتفاع تكلفة النقل والتوزيع بشكل كبير و أضف على كدا إن احنا مانقدرش نقويه وبالتالي كل لما المسافة بتاع النقل بتزيد كل ما التيار المنقول بيقل،
تسأل نفسك ليه هقولك إن فوق شوية قولت ان التيار المستمر ثابت الاتجاه و الشدة ودا من اكبر عيوبه و لأنك كمان و انت بتوصله لازم تحط الموجب على الموجب والسالب علي السالب، دا لما تيجي تحط فيشة (Socket) في تيار مستمر.
التيار المتردد AC:-
خلينا نتفق انه تيار متغير الشدة والاتجاه.
التيار المتردد له اكتر من نوع زي الجيبي، المنشاري، المثلثي، الرباعي.
المميزات:-
أولاً : نقدر ننقله لمسافات طويلة جدا علشان بنقدر نقويه باستخدام محولات رفع وخفض الجهد
ثانياً : معامل قوته يتراوح بين الصفر والواحد لان هو متغير الاتجاه فبيتغير من السالب للموجب ومتغير الشدة ف بيتراوح بين صفر و واحد،
قولتلك انه متغير الاتجاه علشان كدا انت بتحط الفيشة في الكهربا تلاقيها اشتغلت ولو عكستها هتشتغل برضوا عكس التيار المستمر.
تردد التيار المتردد من 50 او 60 هرتز ودا حسب البلد الموجود فيها ودا ليه مقال لوحده بالتفصيل ان شاء الله.
طيب فين عيوبه يبشمهندس!!
الحقيقة ما شوفتش ليه عيب جامد و قاتل الصراحة زى منافسه التيار المستمر إلا انه اكيد لازم التعامل بحرص شديد معاه
و دى قاعدة عامة فى الكهربا بشكل عام، فمتهزرش معاه لحد ما اقولك تحمي نفسك منه ازاي؟.
اعتقد دلوقتي اننا شوفنا الموضوع بنظرة عامة شوية عن التيار المتردد والمستمر
و لحد كدا أظن إن من السهل دلوقتى الإستنتاج و تحديد أيهما أفضل.
و النتيجة أكيد لصالح تسلا واكتشافه.
ايهما يستخدم في البيوت؟
في ناس كتير مننا معتقدة ان التيار المستخدم في البيوت هو التيار المستمر، لكن دا مش صحيح، الصح اننا بنستخدم التيار المتردد في البيوت والاجهزة المنزلية، هتقولي طيب في الموبايل أو اللاب توب إحنا بنستخدم البطاريات و أنت يا بشمهندس قولت فوق ان التيار المستمر بيتم توليده من البطاريات، هقولك إنه بيكون معاها شاحن وبيكون جوا الشاحن دا حاجه اسمها RECTIFIER علشان يحول من التيار المتردد الي التيار المستمر.
طيب دا بالنسبة للبيوت، طيب بالنسبة للخلايا الشمسية اللي إنتاجها عبارة عن تيار مستمر بس؟..... هقولك ان دا سؤال حلو علشان هننتقل منه لجزئية تحويل التيار المستمر لتيار متردد عن طريق ال INVERTER، وبكدا انا استفدت من تيار الخلايا الشمسية في تشغيل جميع اجهزة المنزل.
ايهما اخطر علي حياتنا؟
الصراحة ان الاتنين دمهم تقيل و الهزار مع النوعين ممنوع و زى ما قولنا ان دى قاعدة عامة لكل ما يتعلق بالكهربا لحد مننزل عند الحماية، بس هقولك ان التيار المستمر اشد خطورة لأنه ثابت الشدة ولو مسك فيك كل سنة وانت طيب بقي ونتقابل في الجنة.
انما التيار المتردد بيكون علي شكل موجة من الموجب إلى الصفر ثم إلى السالب و هكذا و هكذا، لكن و هو في مرحلة الصفر تقدر تنجو منه لو مسكك.
**خد بالك ان الانسان تقريبا بيموت اذا تعرض ل 0.1 أمبير لمدة ثانيتين حسب تقرير موقع"sciencebasedlife"، فمتهزرش مع التيار سواء مستمر أو متردد وخاف علي نفسك علشان حياتك مهمة.*
معلومة كدا خفيفة على السريع ليك انت و هى ان اجهزة صواعق الحشرات وغيره بتكون معتمدة اعتماد كلي علي التيار المستمر.
ازاي تحمي نفسك؟
لو بتتعامل مع تيار متردد اللي هو في البيت عندك هتلاقي مثلا اللمبة رايح ليها طرفين سلك واحد فيهم ارضي (Neutral) والتاني اسمه الطرف الحي (Line)، لو مسكت الارضي لوحده مش هتتكهرب لكن لو مسكت الطرف الحي ( Line )ف كل سنة وانت طيب برضوا.
فلما تيجي تشتغل حاول يكون في عازل بينك وبين الارض علشان متبقاش انت مسار للتيار ويمشي ف جسمك، ومتمسكش الطرفين ب ايدك ، يعني اشتغل ب ايد واحده بس.
طيب هتسأل سؤال بيدور فى دماغ أغلبنا..
وهو إننا بنمسك شاحن الموبايل و هو متوصل وما بنتكهربش... ليه بقى؟
علشان بكل بساطة الخرج بتاع الشاحن تيار مستمر بس ضعيف لدرجة انه ميقدرش يكهربك وكمان الفولت بتاعه قليل حولي من 5 ل 9 فولت لكن لو مسكته بإيديك الاتنين هتحس بماس كهربي خفيف كدا، طيب لو بتتعامل مع Power Supply زي بطارية العربية ودي بتطلع فولت عالي اوعي تمسك الطرفين مع بعض لانك هتتكهرب ف تخلى بالك و تشتغل بإيد واحدة بس.
في نهاية المقال اكيد عرفت مين فاز بالحرب بتاعتنا، و مين هو الافضل والمستخدم في حياتنا و طبعا هو التيار المتردد، وعرفت ازاي تتعامل معاه بأمان ومن غير خطر، وكذلك التيار المستمر.
بس كدا يسيدي شوفت الموضوع سهل وبسيط وممتع ازاي؟
نتقابل ان شاء الله فى مقال اخر عن اول محطة Power station اتعملت في التاريخ والفرق بين ال 50 و 60 هرتز في التردد وبنستخدمهم فين وعلي اي اساس...الي اللقاء!